Grænfáninn

14.5.2013

Öldutúnsskóli fékk leyfi til að flagga Grænfánanum  í fjórða skiptið haustið 2014. Fáninn var afhentur í  Hellisgerði við skemmtilega athöfn sem nemendur í 1. og 6. bekk tóku þátt í ásamt umhverfisnefnd skólans. Fulltrúar Landverndar, þær Gerður Magnúsdóttir og Katrín Magnúsdóttir afhentu fánann, sem var síðan flaggað við skólann í viðurvist allra nemenda og starfsmanna skólans. Haustið 2005 fékk Öldutúnsskóli þá viðurkenningu Landverndar að fá að flagga Grænfánanum í fyrsta sinn. Grænfáninn er umhverfismerki vistvænna skóla líkt og hvíti svanurinn er umhverfismerki iðnaðarvara.

Skólinn hefur lengi verið umhverfisvænn og hefur sorp og pappír verið flokkað í mörg ár. Á tveggja ára fresti er endurnýjuð umsókn um fánann og er þá gerð úttekt á umhverfisstefnu skólans og framkvæmd hennar. Haldin var teiknisamkeppni um umhverfismerki skólans vorið 2004  og var teikning Ólafar Körlu Þórisdóttur valin. Þetta merki prýðir síðan ganga skólans og þessa síðu.  

Markmiðin með verkefninu Skóli á grænni grein eru að:

Bæta umhverfi skólans, minnka úrgang og notkun á vatni og orku. Efla samfélagskennd innan skólans. Auka umhverfisvitund með menntun og verkefnum innan kennslustofu og utan. Styrkja lýðræðisleg vinnubrögð við stjórnun skólans þegar teknar eru ákvarðanir sem varða nemendur. Veita nemendum menntun og færni til að takast á við umhverfismál. Efla alþjóðlega samkennd og tungumálakunnáttu. Tengja skólann við samfélag sitt, fyrirtæki og almenning.

Markmið Öldutúnsskóla

Í skólanum fer fram flokkun á sorpi sem til fellur, s.s. pappír, fernur, plast, matarafgangar og ávaxtaúrgangur. Vikulega fer einn bekkur út að hreinsa rusl á skólalóð. Við minnkum notkun rafmagns með því að slökkva ljós þegar þau eru óþörf. Við leggjum áherslu á vettvangsferðir og útinám í nánasta umhverfi og árlega standa nemendur í umhverfisnefndinni fyrir  jafningjafræðslu sem tengist umhverfismálum. Okkur finnst mikilvægt að viðhalda stefnu okkar og fá endurnýjað leyfi til að flagga Grænfánanum og erum stolt af þeirri vinnu sem hér hefur verið. Það er að okkar mati brýnt að nemendur geri sér grein fyrir að við eigum aðeins eina jörð og að orkulindir hennar er ekki óþrjótandi. Við viljum því leggja okkar að mörkum sem vistvænn skóli og kenna nemendum virðingu fyrir umhverfi sínu og orkulindum jarðar. Við skólann er starfandi umhverfisnefnd en í henni sitja fulltrúar nemenda úr öllum bekkjardeildum í  7. 8. 9. og 10 bekk, fulltrúar kennara, skólastjórnandi og fulltrúi foreldra. Ítarlegri upplýsingar um Grænfánaverkefnið er að finna á heimasíðu Landverndar


Öldutúnsskóli | Öldutún 9, 220 Hafnarfjörður
Sími 555-1546 | Netfang oldutunsskoli@oldutunsskoli.is