Öldutúnsskóli

Í námsveri er Skúli Pálsson með heimspeki einn tíma á viku. Markmiðið með heimspeki er að efla gagnrýna og skapandi hugsun. Nemendur sitja þá í hring, rökræða og æfa sig að hugsa út fyrir venjulega hugsun. Rökræða er meira en spjall, hún er umræða með aga. Í heimspekitímunum gilda þrjár einfaldar reglur: 

• einn talar í einu og hinir hlusta
• rökstyðja 
• halda sig við efnið

Starfið er í anda hugmyndarinnar um „heimspeki með börnum“ (Philosophy for Children) sem hefur fest rætur í skólum víða um heim.

Spurningar eru mikils metnar í heimspeki, sérstaklega þær sem eru góðar. Allir sem spyrja góðra spurninga fá plús. Góð spurning er skilgreind sem spurning sem kennarinn getur ekki svarað.

Ytra matið, sem átti að vera í mars en var frestað vegna Covid-19, mun fara fram dagana 22.09. – 28.09.2020. Matið felst m.a. í að matsaðilar frá Menntamálastofnun verða í skólanum áðurnefnda daga og fara í vettvangsathuganir hjá öllum nemendum. Könnun verður send til foreldra í tengslum við matið en einnig taka matsaðilar rýniviðtöl við ýmsa hópa skólasamfélagsins svo sem starfsmenn, foreldra, nemendur og fulltrúa úr skólaráði.

Auk rýnihópaviðtala munu matsaðilar skoða gögn sem fyrir liggja um skólann og varpað geta ljósi á skólastarfið. Matinu er ætlað að vera leiðbeinandi og framfaramiðað. Sérstaklega er huga að því sem er framúrskarandi gott og öðrum til eftirbreytni en matið er líka umbótamiðað og hugsað til að styrkja okkar ágæta skólastarf þegar til lengri tíma er litið.

Undanfarin ár hafa haustfundir með foreldrum verið í september. Í ljósi aðstæðna í samfélaginu þá hefur verið tekin sú ákvörðun að það verða ekki hefðbundnir haustfundir í ár. Þess í stað verður sent kynningarefni til foreldra. Hver árgangur setur saman helstu upplýsingar sem er mikilvægt fyrir foreldra að vita í upphafi skólaárs og senda til þeirra í lok vikunnar, síðasta lagi á mánudag.